2Th 3 | TGG | STEP | Foron tualik kemtuul, igii e nenge orek sabin ae kemtuul ier isi fas gam ini, le gamen sising isi kemtuul, isi orek ke Kumguui ik sararah sape, isi fanu rik bulat lo arae gam sabin gam bulat ta lo.

2 Thessalonians 3

Gamen Sising isi Kemtuul

1 Foron tualik kemtuul, igii e nenge orek sabin ae kemtuul ier isi fas gam ini, le gamen sising isi kemtuul, isi orek ke Kumguui ik sararah sape, isi fanu rik bulat lo arae gam sabin gam bulat ta lo. 2 Ke gamen sising sabin isi kemtuul, isi God ik faliu kemtuul koseng fanu laulau, wara le biil e fanu tikii ri foron tom unune. 3 Isau le Kumguui tom orek suut, in farakrakai gam ke ik fofonoi lo gam sabin koseng Satan. 4 Kemtuul unune lo Kumguui le, gam tel foron tier la tom ae kemtuul fas ta gam ini, ke gamen tel u la tom arae. 5 Kemtuul sising le in lame wolwol kimi isi gamek usum rokap na famais ke God, ke gamek usum sabin na sinangun tifat na foron tatawin ae Karisito i finngas ta kerer ini.

Fafanau usuf foron Tom Angos

6 Foron tualik kemtuul, kemtuul sising gam na asa Kumguui, Iesu Karisito le, gamen fin koseng foron tualik kerer ae ri angos la, ae biil ri mi na foron fafausum ae kemtuul fas ta gam ini. 7 Gam tom, gam ka usum ta lo le, i rokap male gamen mi na tintof ae kemtuul ka tel ta u na matmi. Aunbiing kemtuul kiis turim ta tura gam, biil kemtuul arae foron tom angos. 8 Ke biil sabin kemtuul ien foes ti inen sing tikas ae biil kemtuul fiil u. Biil. Kemtuul foim rakrakai tom na wor ke na siat ini foron lima kemtuul ke kemtuul ka songsong tom na foron foim ae kemtuul tel u la, isi biil kemtuul en ta tatawin usuf tikas lo gam. 9 I tortores le kemtuul en sising gam isi gamen lupes kemtuul. Isau le biil, kemtuul foim rakrakai tom isi kemtuul en fofonoi fis tom lo kemtuul, isi kemtuul ek arae rokap na tintof usuf gam isi gamek mi lo. 10 Aunbiing kemtuul kiis tah tura gam, kemtuul ta ta nagogon igii usuf gam, “Male tikas biil i ier isi foim, ke gong i ien.”

11 Kemtuul ongen u le fal e fanu ae na fatpoto gam ri foron tom angos. Biil ri foim la, ri fakau paklu ri la tom na tier ken fal e fanu keskes. 12 Na asa Kumguui, Iesu Karisito, kemtuul ti kale foron matngan fanu arae, ke kemtuul ka sising ri isi rik mi na sinangun kiis rokap, ke rik foimnge inen ari ae rin ien lo. 13 Ke usuf gam foron tualik kemtuul, gamen foim rakrakai isi gamek tel sinang ae i tortores ma gong gam angos lo.

14 Male tikas biil i misuut na foron orek tikii ae kemtuul siit u igii, ke gamen luun matmi lo. Gong gam fatala turim tura, isi i tom ik par failiim liu kia ma ik matlawen kuna. 15 Isau le gong gam par u aragii nenge tuui kimi, gamen fanau u sau arae nenge tualik gam.

Orek an Famais ke Pol

16 Kemtuul sising le Kumguui ae i ta siaroh la, in ta siaroh usuf gam na foron aunbiing tikii ke na foron tier tikii ae gamen tafe u. Kumguui in kiis tura gam tikii.

17 Iau Pol, ia siit orek an famais igii usuf gam ini limang tom. I e fakileng na foron leta tikii kiak. Ia sisiit la tom arae.

18 Famais ke Kumguui kirer, Iesu Karisito in kiis tura gam tikii.